Rev 4 | AAK | STEP | Xwɨyí̵á apɨ rɨxa nɨnɨrárɨmáná eŋáná Jononɨ wenɨŋí̵ yání̵áyí̵ wɨnɨŋanigɨnɨ. Aŋí̵namɨ aŋí̵ ówaŋí̵ wɨna í̵kwiárɨnɨŋagɨ nɨwɨnɨrɨ maŋí̵ xámɨ pe'kákí̵nɨŋí̵ rarɨŋagɨ arí̵á wíá axí̵pá “Amɨpí apimɨ dánɨ rí̵wí̵yo nimónɨní̵ápɨ sɨwá simɨ nánɨ re nánɨ yapeɨ.” nɨre'napí̵agɨ arí̵á nɨwirí̵ná

Revelation of John 4

Orɨŋá nɨwɨnɨrí̵ná aŋí̵namɨ Gorɨxo tí̵ŋí̵ e imónɨŋí̵pɨ wɨnɨŋí̵ nánɨrɨnɨ.

1 Xwɨyí̵á apɨ rɨxa nɨnɨrárɨmáná eŋáná Jononɨ wenɨŋí̵ yání̵áyí̵ wɨnɨŋanigɨnɨ. Aŋí̵namɨ aŋí̵ ówaŋí̵ wɨna í̵kwiárɨnɨŋagɨ nɨwɨnɨrɨ maŋí̵ xámɨ pe'kákí̵nɨŋí̵ rarɨŋagɨ arí̵á wíá axí̵pá “Amɨpí apimɨ dánɨ rí̵wí̵yo nimónɨní̵ápɨ sɨwá simɨ nánɨ re nánɨ yapeɨ.” nɨre'napí̵agɨ arí̵á nɨwirí̵ná 2 axíná re eŋɨnigɨnɨ. Gorɨxoyá kwíyí̵pɨ nɨxɨxe'roŋɨnigɨnɨ. Nɨxɨxe'róáná wenɨŋí̵ e'áyí̵ wɨnɨŋanigɨnɨ. Mɨxí̵ ináyí̵yá siá íkwiaŋwí̵ wɨna aŋí̵namɨ ŋwɨrárɨnɨŋagɨ wɨnɨrɨ anamɨ wo e'í̵ ŋweaŋagɨ wɨnɨrɨ eŋanigɨnɨ. 3 Anamɨ e'í̵ ŋweaŋo xegí̵ imónɨŋí̵pɨ, ayí̵ sí̵ŋá awiaxí̵ jasɨpáɨ rɨnɨŋí̵pɨ yaí̵ kɨkírorɨ xwɨní̵á earɨ yarɨŋí̵pa erɨ sí̵ŋá konirianí̵yɨ rɨnɨŋí̵pɨ ayí̵á rɨrɨ xwɨní̵á earɨ yarɨŋí̵pa erɨ eŋo e e'í̵ ŋweaŋagɨ nɨwɨnɨrɨ opínagwí̵á sí̵ŋá emeráɨ rɨnɨŋí̵pí̵nɨŋí̵ sowinɨŋí̵ imónɨŋí̵pɨ siá íkwiaŋwí̵ anamɨ xapɨxapí̵ eadí̵roŋagɨ nɨwɨnɨrɨ 4 íkwiaŋwí̵ anamɨ dánɨ ámɨ obaxí̵ bɨ 24 imónɨŋí̵pɨ mɨdɨmɨdánɨ nɨŋwɨrárɨnɨga puŋagɨ nɨwɨnɨrɨ ámá ámɨná 24 awa rapɨrapí̵ apí̵á weŋí̵ nɨyínɨrɨ amɨnaŋwí̵ sí̵ŋá gorí̵ tí̵nɨ imɨxɨnɨŋí̵ nɨdí̵kínɨmáná íkwiaŋwí̵ mɨdɨmɨdánɨ nɨŋwɨrárɨnɨga puŋí̵pimɨ nɨŋweaxa puŋagí̵a nɨwɨnɨrɨ 5 íkwiaŋwí̵ áwɨnɨmɨ eŋí̵namɨ dánɨ ápiaŋwí̵ ne'ra urɨ ikaxí̵ nɨra urɨ akɨrɨwí̵ nɨra urɨ yarɨŋagɨ nɨwɨnɨrɨ uyí̵wí̵ we' wí̵u'mɨ dáŋí̵ wau' —Ayí̵ Gorɨxoyá kwíyí̵ we' wí̵u'mɨ dáŋí̵ wau' apɨ nánɨrɨnɨ. Ayí̵ siá íkwiaŋwí̵ anamɨ sí̵mɨmaŋí̵mɨnɨ ápiáwí̵ wearɨŋagɨ nɨwɨnɨrɨ 6 íkwiaŋwí̵ anamɨ sí̵mɨmaŋí̵mɨnɨ bɨ rawɨrawánɨŋí̵ imónɨŋí̵ bɨ rɨrɨmá sɨŋwí̵ wɨnɨpaxí̵ imónɨŋí̵pɨ weŋagɨ nɨwɨnɨrɨ dɨŋí̵ tí̵ŋí̵ imónɨŋí̵ wau' wau' awa agwí̵ rɨwámɨnɨ sɨŋwí̵nɨ nɨrómɨxa urɨ rí̵wí̵ rɨwámɨnɨ nɨrómɨxa urɨ egí̵áwa áwɨnɨ e ŋwearo íkwiaŋwí̵namɨ mɨdɨmɨdánɨ ŋwearo eŋagí̵a wɨnɨŋanigɨnɨ. 7 Dɨŋí̵ tí̵ŋí̵ imónɨŋí̵ wɨnɨŋáwa wo raioní̵nɨŋí̵ imónɨŋí̵pɨ —Apɨ pusí̵ sayí̵ xwe'rɨxa mɨxí̵ yarɨŋí̵pɨrɨnɨ. Apí̵nɨŋí̵ imónɨŋorɨnɨ. Ámɨ wo burɨmákau'nɨŋí̵ imónɨŋorɨnɨ. Ámɨ wo ámá sí̵mɨmaŋí̵nɨŋí̵ inɨŋorɨnɨ. Ámɨ wo apurí̵ nɨpɨpɨka warɨŋí̵pí̵nɨŋí̵ imónɨŋorɨnɨ. 8 Awau' awau' awa wonɨ wonɨ ɨwí̵ we' wí̵u'mɨ dáŋí̵ wo ero wará nɨpɨnɨ sɨŋwí̵nɨ nɨrómɨxa ugí̵áwarɨnɨ. Ikwáwɨyiranɨ, árí̵wɨyiranɨ, bɨ pí̵nɨ mɨwiárí̵ anɨŋí̵ miní̵ re nɨra warɨgí̵árɨnɨ, “Ámɨná Gorɨxo, o eŋí̵ eánɨŋí̵ ámá woyápɨ tí̵nɨ xɨxenɨ mimónɨŋorɨnɨ. Eŋíná dánɨ ŋwearɨ ríná sɨnɨ ŋwearɨ rí̵we'ná anɨŋí̵ ŋwearɨ ení̵orɨnɨ. Xewɨnɨ xegí̵ bɨ imónɨŋorɨnɨ. Aga xegí̵ bɨ imónɨŋorɨnɨ. Oyɨ, aga xegí̵ bɨ imónɨŋorɨnɨ.” 9 Íníná e nɨra nuro íkwiaŋwí̵ anamɨ ŋweaŋomɨ, anɨŋí̵ imónɨŋomɨ seáyɨ e umero we' íkwiaŋwí̵yo uŋwɨrárɨro yayí̵ wiro e'áná 10 ámá ámɨná 24 imónɨgí̵á mɨdɨmɨdánɨ e'í̵ ŋweagí̵áwa íkwiaŋwí̵ anamɨ ŋweaŋomɨ nupí̵kínɨmearo wigí̵ amɨnaŋwí̵ sí̵ŋá gorí̵ tí̵nɨ imɨxɨnɨŋí̵pɨ nɨpírɨro xí̵o tí̵ŋí̵ e nɨmoauróná re urarɨgí̵árɨnɨ, 11 “Negí̵ Ámɨnáoxɨ imónɨrɨ Ŋwí̵áoxɨ imónɨrɨ eŋoxɨnɨ, amɨpí ní̵nɨ eŋí̵pɨ imɨxɨŋoxɨ, ayí̵ joxɨrɨnɨ. Nɨpɨnɨ pípimɨ dánɨ marí̵áɨ, joxɨ simónɨŋí̵pimɨ dánɨnɨ imónɨrɨ apimɨ dánɨ enɨ sɨnɨ imónɨrɨ eŋí̵ eŋagɨ nánɨ ámá ní̵nɨ joxɨ seáyɨ e rɨmero we' íkwiaŋwí̵yo rɨŋwɨrárɨro ‘Eŋí̵ wiárí̵ nɨmu'rorɨ eánɨŋoxɨ, ayí̵ joxɨrɨnɨ.’ rɨrɨro sipaxoxɨrɨnɨ.” rarɨgí̵árɨnɨ.